BuySale dasturidan foydalanish bo‘yicha ommaviy oferta

1. Atamalar

1.1. Oferta — ushbu hujjat. Shartnoma — Ofertani aksept qilish natijasida Operator va Foydalanuvchi o‘rtasida tuzilgan shartnoma; uning tarkibi 2.5-bandda ko‘rsatilgan. Operator — "BUYSALE" mas’uliyati cheklangan jamiyati.

1.2. Foydalanuvchi — Hisob ochgan va Ofertani aksept qilgan do‘kon egasi: yuridik shaxs, yakka tartibdagi tadbirkor yoki o‘zini o‘zi band qilgan shaxs (2.4-band). Xodim — Foydalanuvchi Hisobga qo‘shgan va PIN-kod bilan kiradigan shaxs. Mijoz — do‘kon xaridori, shu jumladan nasiyaga xarid qilgan shaxs. Xodim va Mijoz Shartnoma tarafi emas.

1.3. Xizmat — BuySale dasturi va unga bog‘liq imkoniyatlar. Ilova — https://app.buysale.uz manzilidagi dastur, uning o‘rnatiladigan va Telegram ichidagi ko‘rinishlari. Bot — Telegramdagi BuySale boti. Hisob (kabinet) — Foydalanuvchining telefon raqamiga bog‘langan, do‘kon ma’lumotlari va Balans yuritiladigan shaxsiy kabinet.

1.4. Balans — Hisobdagi oldindan to‘langan mablag‘ qoldig‘i (so‘mda). Kunlik to‘lov — bir kalendar kun (Toshkent vaqti bilan) uchun Xizmat haqi. Sinov muddati — yangi Hisob uchun Kunlik to‘lov olinmaydigan 14 kalendar kun; Hisob ochilgan kun birinchi kun hisoblanadi; AI uchun haq bu davrda ham 5.8-bandga ko‘ra olinadi. Qarzdorlik (minus balans) — Balans noldan past bo‘lganda uning manfiy summasi; masalan, Balans −5 000 so‘m bo‘lsa, Qarzdorlik 5 000 so‘m.

1.5. Aksept — Ofertani 2.2-bandda ko‘rsatilgan usulda to‘liq va so‘zsiz qabul qilish. AI yordamchi — Xizmatdagi sun’iy intellekt yordamchisi (10-bo‘lim). Maxfiylik siyosati — https://buysale.uz/maxfiylik/ manzilida e’lon qilingan hujjat.

1.6. Asosiy do‘kon — Foydalanuvchi 4.1-bandga ko‘ra telefon raqami bilan ochgan do‘kon. Filial — Foydalanuvchi Ilovada asosiy do‘kon Hisobidan 4.5-bandga ko‘ra ochgan qo‘shimcha do‘kon. Filiallar asosiy do‘kon Hisobi tarkibiga kiradi va alohida Hisob hisoblanmaydi: Foydalanuvchi va Balans bitta. Tovar o‘tkazmasi — tovarni asosiy do‘kon va filiallar o‘rtasida Ilova orqali yuborish (3.8-band).

2. Umumiy qoidalar

2.1. Shartnoma Fuqarolik kodeksining 360-moddasi ma’nosida qo‘shilish shartnomasi hisoblanadi. Ofertani boshqa shartlarda qabul qilish haqidagi javob aksept hisoblanmaydi (Fuqarolik kodeksining 375-moddasi).

2.2. Quyidagi harakatlardan qaysi biri birinchi bajarilsa, o‘sha harakat aksept hisoblanadi: 1) Ilovada Oferta va Maxfiylik siyosati havolalari ko‘rsatilgan oynada ularga roziligini bildiruvchi belgini (“Ommaviy oferta va maxfiylik siyosatini o‘qidim, shartlariga roziman” yoki Ilovaning tanlangan tilidagi shu matn) o‘zi qo‘yib, “Tasdiqlash va davom etish” (yoki Ilovaning tanlangan tilidagi shu) tugmasini bosish; 2) Balansni to‘ldirish (Fuqarolik kodeksi 370-moddasining to‘rtinchi qismi). Shartnoma aksept qilingan paytdan boshlab tuzilgan hisoblanadi.

2.3. Ofertani faqat Foydalanuvchi aksept qiladi; Xodimlar uni aksept qila olmaydi va Ofertaning amaldagi tahriri aksept qilinmaguncha Ilovadan foydalana olmaydi. Ilova aksept oynasini Hisobga birinchi kirishda va Ofertaning yangi tahriri e’lon qilinganda ko‘rsatadi (14.3-band). Operator aksept dalili sifatida quyidagilarni saqlaydi: do‘kon, telefon raqami, Oferta versiyasi, ko‘rsatilgan til, matn izi (SHA-256), noyob aksept raqami, IP-manzil, qurilma va brauzer ma’lumoti, aksept kanali va vaqti.

2.4. Ofertani faqat tadbirkorlik faoliyatini qonuniy amalga oshiruvchi shaxs aksept qila oladi: yuridik shaxs (vakolatli vakili orqali), yakka tartibdagi tadbirkor yoki o‘zini o‘zi band qilgan shaxs. Aksept qilgan shaxs shunday maqomga ega ekanini va Xizmatdan tadbirkorlik faoliyati uchun foydalanishini kafolatlaydi. Yuridik shaxsning vakili Operator talabiga ko‘ra vakolatini tasdiqlovchi hujjatni taqdim etadi.

2.5. Oferta, Maxfiylik siyosati va https://buysale.uz/narxlar/ sahifasida e’lon qilingan narxlar birgalikda yagona Shartnomani tashkil etadi. Shaxsga doir ma’lumotlarga oid masalalarda Oferta va Maxfiylik siyosati o‘rtasida nomuvofiqlik bo‘lsa, Maxfiylik siyosati qo‘llaniladi, biroq u 9.2 va 9.4-bandlarda ko‘rsatilganidan tashqari ma’lumot uzatishga asos bo‘lmaydi. Ofertaning amaldagi tahriri: https://buysale.uz/oferta/.

2.6. Taraflar Bot yuborgan bir martalik kod bilan yoki Hisobga bog‘langan Telegram akkaunti orqali kirilgan Hisobdan bajarilgan harakatlarni (aksept, Balansni to‘ldirish so‘rovini yuborish, arizalar va boshqalar) Foydalanuvchining elektron tasdig‘i, Xodim o‘z PIN-kodi bilan kirib bajargan harakatlarni esa Foydalanuvchi nomidan bajarilgan harakatlar deb tan oladi (Elektron tijorat to‘g‘risidagi qonunning 14 va 21-moddalari).

2.7. Akseptni chaqirib olish haqidagi xabar Operatorga aksept bilan bir vaqtda yoki undan oldin yetib kelsa, aksept olinmagan hisoblanadi (Fuqarolik kodeksining 371-moddasi); aksept olingandan keyin Foydalanuvchi Shartnomani 13.1-bandga ko‘ra bekor qiladi. Oferta shartlari muzokara yo‘li bilan o‘zgartirilmaydi va to‘ldirilmaydi; Foydalanuvchi uchun alohida Kunlik to‘lov faqat Operator bilan yozma (elektron) kelishuvda belgilanishi mumkin.

2.8. Foydalanuvchining rekvizitlari — Hisobdagi telefon raqami, do‘kon nomi va manzili. Foydalanuvchi Operator so‘roviga ko‘ra o‘z nomini (jismoniy shaxs — familiyasi, ismi va otasining ismini), STIR, pochta va elektron pochta manzilini hamda bank rekvizitlarini taqdim etadi.

3. Shartnoma predmeti

3.1. Operator Foydalanuvchiga Xizmatdan internet orqali haq evaziga foydalanish imkonini beradi, Foydalanuvchi esa 5-bo‘limga ko‘ra haq to‘laydi. Xizmat quyidagilarni o‘z ichiga oladi: kassa va qaytarish, ombor, Mijozlarning qarz daftari, ta’minotchilar, xarajatlar, Xodimlar va ularning ruxsatlari, Xodimlar ko‘rsatkichlari (KPI), filiallar va tovar o‘tkazmalari, Ilova ichidagi bildirishnomalar, hisobotlar va eksport, shtrix-kod o‘qish, yorliq va chek chop etish, AI yordamchi, Bot. Imkoniyatlar do‘kon turi va ruxsatlarga qarab farqlanadi.

3.2. Xizmat “qanday bo‘lsa, shunday” holatida taqdim etiladi; uning uzluksiz va xatosiz ishlashi, har qanday printer yoki skaner bilan ishlashi kafolatlanmaydi. Xizmat internet aloqasisiz ishlamaydi. Internet aloqasi, qurilma, Telegram akkaunti va printerni Foydalanuvchi o‘zi ta’minlaydi va ularning xarajatlarini o‘zi to‘laydi.

3.3. Xizmat nazorat-kassa texnikasi yoki virtual kassa emas va fiskal chek shakllantirmaydi; Ilova orqali chop etilgan chek fiskal hujjat hisoblanmaydi.

3.4. Ushbu tahrir kuchga kirgan sanada Xizmat SMS yubormaydi va qo‘ng‘iroq qilmaydi. Ilovadagi qarz eslatmalari sozlamalari eslatmani hech qanday kanal orqali, shu jumladan Telegram orqali ham yubormaydi — eslatma faqat jurnalga yoziladi; ular uchun haq olinmaydi. Botga ulangan Mijozga Telegram orqali faqat savdo cheki, Botga ulanish tasdig‘i va Mijoz so‘raganda uning xaridlari va qarzi haqidagi ma’lumot yuboriladi. Botga ulanmagan Mijozga Xizmat hech qanday xabar yubormaydi.

3.5. Operator Xizmatni o‘zgartirishi yoki uning ayrim imkoniyatlarini butunlay to‘xtatishi mumkin. Asosiy imkoniyatlarni (savdo, ombor, qarz daftari, hisobotlar) butunlay to‘xtatish yoki ularni jiddiy yomonlashtirish 14-bo‘limga ko‘ra muhim o‘zgarish hisoblanadi.

3.6. Foydalanuvchi kiritgan shtrix-kod, tovar nomi va o‘lchov birligi umumiy tovar ma’lumotnomasiga qo‘shilishi va boshqa Foydalanuvchilarga maslahat sifatida ko‘rsatilishi mumkin; narx, qoldiq va do‘kon haqidagi ma’lumotlar ko‘rsatilmaydi. Bu yozuvlar Hisob o‘chirilgandan keyin ham ma’lumotnomada qoladi. Dasturga bo‘lgan huquqlar Operatorda yoki boshqa huquq egalarida qoladi. Foydalanuvchi kiritgan ma’lumotlar ushbu band va 3.7-bandda nazarda tutilgan foydalanishni hisobga olgan holda Foydalanuvchiga tegishli.

3.7. Operator Foydalanuvchiga Shartnoma amal qilgan davrda Xizmatdan uning vazifasiga ko‘ra foydalanish uchun oddiy (nomutlaq), boshqa shaxsga berilmaydigan huquq beradi (Xodimlarga Hisobga kirish berish boshqa shaxsga berish hisoblanmaydi). Foydalanuvchi Operatorga o‘zi kiritgan ma’lumotlardan faqat Xizmatni ko‘rsatish uchun, 3.6-bandda ko‘rsatilgan shtrix-kod, tovar nomi va o‘lchov birligidan esa umumiy ma’lumotnomada muddatsiz va bepul foydalanish huquqini beradi.

3.8. Tovar o‘tkazmasida jo‘natilgan tovar jo‘natuvchi do‘kon qoldig‘idan darhol chiqariladi va qabul qiluvchi do‘kon uni Ilovada qabul qilguncha yoki rad etguncha hech qaysi do‘kon qoldig‘ida hisoblanmaydi. Qabul qilingan miqdor qabul qiluvchi do‘kon qoldig‘iga qo‘shiladi; jo‘natilgan va qabul qilingan miqdor o‘rtasidagi farq kamomad sifatida yozib qo‘yiladi va jo‘natuvchi do‘konga qaytarilmaydi. Jo‘natilganidan ortiq miqdorni o‘tkazma orqali qabul qilib bo‘lmaydi. Rad etilgan yoki qabul qilinguncha bekor qilingan o‘tkazmadagi tovar jo‘natuvchi do‘kon qoldig‘iga qaytariladi. Tovarni sanash, jo‘natish, tashish, saqlash va qabul qilish hamda o‘tkazmada kiritilgan miqdorlarning haqiqiy holatga mosligi uchun Foydalanuvchi javob beradi. Ilova tovar o‘tkazmasi uchun yuk xati yoki boshqa birlamchi hisob hujjatini shakllantirmaydi; bunday hujjatlar zarur bo‘lsa, ularni Foydalanuvchi o‘zi rasmiylashtiradi.

3.9. Ilova Xodimlar bo‘yicha savdo ko‘rsatkichlarini (KPI) hisoblaydi va Foydalanuvchi belgilagan oylik reja va bonus shartlari bo‘yicha bonus summasini ko‘rsatadi. Bu raqamlar Hisobdagi yozuvlar asosida faqat ma’lumot uchun qilingan hisob-kitob hisoblanadi: ular ish haqi hisob-kitobi, buxgalteriya yoki soliq hujjati emas, Foydalanuvchi va Xodim o‘rtasidagi kelishuvni almashtirmaydi; Xizmat ular bo‘yicha hech qanday to‘lov qilmaydi va xarajat yozmaydi. Xodim bilan mehnat munosabatlari, ish haqi va bonusni belgilash, hisoblash, to‘lash va ularga soliq solish uchun Foydalanuvchi javob beradi. Ko‘rsatkichlar Foydalanuvchi va Xodimlar kiritgan ma’lumotlarga bog‘liq: bu ma’lumotlar noto‘g‘ri bo‘lsa, ko‘rsatkichlar ham noto‘g‘ri bo‘ladi. Xodim ko‘rsatkichlari, reja va bonus shartlari Xodimlar ma’lumotlari hisoblanadi va ularga 9-bo‘limga ko‘ra ishlov beriladi.

3.10. Ilova ichidagi bildirishnomalar ro‘yxati Hisobdagi mavjud yozuvlar (Balans harakatlari, tovar o‘tkazmalari, Xodimlarning kirishi, farq bilan yopilgan smenalar) asosida faqat ma’lumot uchun ko‘rsatiladi. U SMS yoki push-xabar sifatida yuborilmaydi va 11.3-bandda ko‘rsatilgan xabar hisoblanmaydi. Balans harakatlari Ilovaning Balans bo‘limida ham ko‘rsatiladi; nomuvofiqlik bo‘lsa, Balans bo‘limidagi ma’lumot qo‘llaniladi.

4. Hisob va xavfsizlik

4.1. Hisob birinchi kirishda ochiladi: telefon raqami va Bot yuborgan bir martalik kod kiritiladi. Kod faqat Botga aynan shu telefon raqamini ulashgan Telegram akkauntiga yuboriladi; shu sababli Xizmatdan foydalanish uchun Telegram akkaunti zarur. Ilova Telegram ichida ochilganda Hisobga bog‘langan Telegram akkaunti orqali kod so‘ralmasdan kiriladi; shu sababli Telegram akkauntining xavfsizligi uchun Foydalanuvchi javob beradi. Hisobga kirish uchun telefon raqamini Operator Foydalanuvchining murojaatiga ko‘ra, Hisob unga tegishli ekanini tekshirgandan keyin o‘zgartiradi.

4.2. Foydalanuvchi Xodimga ism, 4 xonali PIN-kod va ruxsatlar beradi. Xodim Hisob telefon raqami va o‘z PIN-kodi bilan kiradi. Foydalanuvchi Botga ulangan bo‘lsa, u Telegramda Xodim Ilovaga kirgani haqida (bu xabarlar sozlamada o‘chirilmagan bo‘lsa; 30 daqiqa ichidagi takroriy kirish haqida xabar yuborilmaydi) va PIN-kod bir necha marta noto‘g‘ri terilgani sababli kirish bloklangani haqida xabar oladi. Kunlik moliyaviy hisobot ham sukut bo‘yicha kechqurun Telegramga yuboriladi va sozlamada o‘chirilishi mumkin.

4.3. Foydalanuvchi Hisob orqali bajarilgan barcha harakatlar, shu jumladan Xodimlarning harakatlari uchun javob beradi. U bir martalik kodlar va PIN-kodlarni sir saqlaydi va ishdan ketgan Xodimni Ilovadan o‘chiradi. Ruxsatsiz kirishga shubha bo‘lsa, Foydalanuvchi PIN-kodlarni almashtiradi va 11.2-banddagi kanallar orqali Operatorga xabar beradi.

4.4. Ruxsatsiz kirish yoki qonunga xilof foydalanishga asosli shubha, Operator, Foydalanuvchi yoki uchinchi shaxslarga zarar yetkazilish xavfi yoxud davlat organining qonuniy talabi bo‘lsa, Operator Hisobni vaqtincha cheklashi mumkin. Cheklov sababi 11.3-bandda ko‘rsatilgan usulda bildiriladi. Cheklov asossiz bo‘lsa yoki Foydalanuvchining aybi bo‘lmasa, cheklov kunlari uchun Kunlik to‘lov olinmaydi, yechilgan bo‘lsa Balansga qaytariladi.

4.5. Foydalanuvchi Ilovada asosiy do‘kon Hisobidan filial ochishi, uni yopishi va qayta ochishi mumkin; Operator ochiq filiallar soniga chegara belgilashi mumkin va chegaraga yetilganda Ilova bu haqda xabar beradi; Xizmat to‘xtatib turilgan paytda (5.6-band) filial ochib yoki qayta ochib bo‘lmaydi. Filial ochish, yopish va qayta ochish hamda filiallar o‘rtasida o‘tishni faqat Foydalanuvchining o‘zi bajaradi, Xodim bajara olmaydi; Xodim faqat o‘zi qo‘shilgan do‘konda (asosiy do‘kon yoki filialda) ishlaydi. Filial Xodimi asosiy do‘kon telefon raqami va o‘z PIN-kodi bilan kiradi; PIN-kodlar asosiy do‘kon va barcha filiallar Xodimlari o‘rtasida takrorlanmasligi kerak. Filial Xodimlari kirgani haqidagi xabarlar va kunlik moliyaviy hisobot (asosiy do‘kon, har bir filial va jami bo‘yicha) asosiy do‘kon Hisobiga bog‘langan Telegram akkauntiga yuboriladi; Bot (qarz yozuvlari va AI yordamchiga savollar) faqat asosiy do‘kon ma’lumotlari bilan ishlaydi. Yopilgan filialga hech kim, shu jumladan Foydalanuvchi ham kira olmaydi; uning ma’lumotlari saqlanadi va filial qayta ochilganda yana foydalanish mumkin bo‘ladi. Tasdiqlanmagan tovar o‘tkazmasi bor filial yopilmaydi. Filial butunlay o‘chirilishi Foydalanuvchining 11.2-banddagi kanallar orqali yuborgan so‘roviga ko‘ra 13.2-bandda belgilangan tartibda bajariladi; filiallari bor asosiy do‘kon Hisobi filiallar o‘chirilgandan keyin o‘chiriladi. Avval alohida ochilgan Hisobni filialga aylantirib bo‘lmaydi.

4.6. Filiallar uchun alohida Balans yuritilmaydi: filiallar uchun Kunlik to‘lov va AI uchun haq (5.8-band) asosiy do‘kon Balansidan yechiladi, Balans faqat asosiy do‘kondan to‘ldiriladi (filialdan to‘ldirib bo‘lmaydi), 6-bo‘lim esa asosiy do‘kon Balansiga nisbatan qo‘llaniladi. Har bir ochiq filial uchun Kunlik to‘lov (filial narxi) https://buysale.uz/narxlar/ sahifasida e’lon qilinadi va filial ochilishidan oldin Ilovada ko‘rsatiladi; Operator bilan yozma (elektron) kelishuvga (2.7-band) ko‘ra muayyan filial uchun boshqa narx belgilanishi yoki haq olinmasligi mumkin. Filial narxi filial ochilgan kundan keyingi kundan boshlab asosiy do‘kon Kunlik to‘lovi bilan birga 5.4-bandda belgilangan tartibda yechiladi; kelishuvda boshqacha belgilanmagan bo‘lsa, asosiy do‘kon Kunlik to‘lovi kamaytirilgan yoki olinmaydigan bo‘lsa ham filial narxi yechiladi. Asosiy do‘konning Sinov muddati va sovg‘a kunlarida filiallar uchun ham Kunlik to‘lov olinmaydi; filial uchun alohida Sinov muddati berilmaydi. Filial yopilgan kundan keyingi kundan boshlab, shuningdek Operator filialni cheklagan (4.4-band) kunlar uchun filial narxi olinmaydi. Yopilgan filial qayta ochilganda shu kun uchun Kunlik to‘lov asosiy do‘kon Balansidan allaqachon yechilgan bo‘lsa, shu kunning filial narxi qayta ochish paytida yechiladi (filial shu kunning o‘zida yopilgan bo‘lsa, qo‘shimcha haq olinmaydi); Ilova bu summani qayta ochishdan oldin ko‘rsatadi. Filial narxining oshishi 5.9-bandga ko‘ra e’lon qilinadi. Xizmat 5.6-bandga ko‘ra to‘xtatib turilganda, u asosiy do‘konda va barcha filiallarda bir vaqtda to‘xtatib turiladi.

5. Narxlar va to‘lov

5.1. Xizmat haqi Kunlik to‘lov shaklida olinadi; tarif rejalari (paketlar) va oylik obuna yo‘q. Kunlik to‘lov miqdori do‘kon turiga qarab belgilanadi va https://buysale.uz/narxlar/ sahifasida hamda Ilovada faqat so‘mda e’lon qilinadi. Operator bilan yozma (elektron) kelishuvga (2.7-band) yoki Operator e’lon qilgan aksiya shartlariga ko‘ra Kunlik to‘lov kamaytirilishi yoki olinmasligi mumkin. Tanlangan do‘kon turi Foydalanuvchining haqiqiy faoliyatiga mos kelmasa, Operator Foydalanuvchini 11.3-bandda ko‘rsatilgan usulda oldindan ogohlantirib, do‘kon turini o‘zgartirishi mumkin. Filiallar uchun Kunlik to‘lov 4.6-bandga ko‘ra olinadi.

5.2. Sinov muddatida Kunlik to‘lov olinmaydi. Sinov muddati tugagach, Xizmat Balansdagi mablag‘ bilan ishlashda davom etadi yoki 5.6-bandga ko‘ra to‘xtatib turiladi. Do‘kon turi o‘zgarsa, Sinov muddati qaytadan boshlanmaydi.

5.3. Balans Ilova orqali ochiladigan Rahmat to‘lov sahifasida (keyingi o‘rinlarda — Rahmat sahifasi) to‘ldiriladi; Rahmat sahifasi orqali to‘lash imkoni bo‘lmagan davrda 5.13-band qo‘llaniladi. Rahmat sahifasini to‘lov tashkiloti “Multicard Payment” AJ (keyingi o‘rinlarda — To‘lov tashkiloti) yuritadi. Foydalanuvchi Ilovada to‘ldirish summasini kiritadi va uni Rahmat sahifasida to‘laydi; to‘ldirish summasiga 5.11-banddagi To‘lov komissiyasi qo‘shib to‘lanadi. Ushbu tahrir kuchga kirgan sanada Rahmat sahifasida Uzcard va Humo bank kartalari bilan to‘lash mumkin, Visa va Mastercard kartalari bilan to‘lash imkoni yo‘q; To‘lov tashkiloti boshqa to‘lov usullarini qo‘shsa, ular Rahmat sahifasida ko‘rsatiladi. Karta ma’lumotlari faqat Rahmat sahifasida kiritiladi; Operator ularni olmaydi va saqlamaydi (Maxfiylik siyosatiga qarang). To‘lov tashkiloti to‘lovni muvaffaqiyatli deb tasdiqlagan paytda to‘lov amalga oshirilgan hisoblanadi; Operator bu tasdiqni olgach, to‘ldirish summasi avtomatik ravishda, Operatorning alohida tasdig‘isiz Balansga qo‘shiladi. Bir martalik to‘ldirish summasi Operator belgilagan va Ilovada ko‘rsatiladigan eng kam summadan (u 1 000 so‘mdan kam emas) kam va 50 000 000 so‘mdan ko‘p bo‘lishi mumkin emas; To‘lov tashkiloti va karta chiqargan bank o‘z cheklovlarini ham qo‘llashi mumkin. Muvaffaqiyatsiz, bekor qilingan va qaytarilgan to‘lovlarga 5.12-band, boshqa yo‘l bilan o‘tkazilgan pulga esa 5.13-band qo‘llaniladi.

5.4. Kunlik to‘lov har bir kalendar kun uchun oldindan, shu kun boshlangandan keyin Xizmat birinchi marta hisob-kitob qilganda yechiladi. Kundan qisman foydalanilgan yoki umuman foydalanilmagan bo‘lsa ham, Kunlik to‘lov to‘liq miqdorda yechiladi. Balans va Xizmat qaysi kungacha ishlashi Ilovada ko‘rsatiladi.

5.5. Navbatdagi kun boshlanganda Balans noldan katta bo‘lsa, u bir kunlik to‘lovga yetmasa ham, shu kun uchun Kunlik to‘lov to‘liq yechiladi va Xizmat ishlashda davom etadi. Natijada Balans manfiy bo‘lishi mumkin; manfiy summa Qarzdorlik hisoblanadi.

5.6. To‘langan kunlar tugagach Balans nol yoki manfiy bo‘lsa, Xizmat to‘xtatib turiladi: bu davrda Ilovada savdo, kirim, qarz va boshqa yozuvlarni kiritish va o‘zgartirish mumkin emas (Profil va Balans bo‘limlari bundan mustasno), ammo ma’lumotlarni ko‘rish, 8.2-banddagi mavjud eksportdan foydalanish va Balansni to‘ldirish mumkin.

5.7. Xizmat to‘xtatib turilgan kunlar uchun Kunlik to‘lov olinmaydi. Balansga qo‘shilgan pul avval Qarzdorlikni qoplashga yo‘naltiriladi. Qolgan summa noldan katta bo‘lsa, Xizmat pul Balansga qo‘shilgan kundan qayta ishlaydi va shu kundan boshlab Kunlik to‘lov yechiladi.

5.8. Do‘kon turiga qarab AI yordamchiga beriladigan har bir savol va AI yordamida yorliqni o‘qish uchun alohida haq belgilanishi mumkin. Narxlar https://buysale.uz/narxlar/ sahifasida e’lon qilinadi, savol narxi AI yordamchi oynasida ham ko‘rsatiladi. Savol uchun haq model javob qaytargan har bir so‘rov uchun (javob chala bo‘lsa ham), yorliq uchun haq esa yorliqdan kamida bitta maydon o‘qilganda Balansdan yechiladi, shu jumladan Sinov muddatida va Balans manfiy bo‘lganda ham. Xizmat to‘xtatib turilganda AI yordamchi ishlamaydi.

5.9. Narxlarning oshishi yoki yangi pullik xizmatning joriy etilishi kuchga kirishidan kamida 30 kalendar kun oldin Ilovadagi e’londa, Hisobga bog‘langan Telegram akkauntiga yuboriladigan xabarda va https://buysale.uz/narxlar/ sahifasida e’lon qilinadi; narxlarning pasayishi darhol qo‘llanishi mumkin. Narx o‘zgarishi Kunlik to‘lovi allaqachon yechilgan kunlarga ta’sir qilmaydi. Rozi bo‘lmagan Foydalanuvchi e’lon qilingan kundan boshlab o‘zgarish kuchga kirganidan keyingi 30 kalendar kun tugagunga qadar Shartnomani 13.1-bandga ko‘ra bekor qilishi va ishlatilmagan Balansni 6.2-bandga ko‘ra qaytarib olishi mumkin.

5.10. Operator bergan bonus mablag‘lar (shu jumladan Xizmatga boshqa do‘konni taklif qilgani uchun, taklif qilingan do‘kon birinchi to‘lovni amalga oshirgandan keyin beriladigan bonus) va sovg‘a kunlar faqat Xizmat haqini to‘lashga ishlatiladi va pul bilan qaytarilmaydi. Boshqa do‘konni taklif qilgani uchun bonus taklif qilingan do‘kon Rahmat sahifasi orqali amalga oshirgan to‘lovlar uchun berilmaydi. Rahmat sahifasi orqali qilingan to‘lov bo‘yicha qonunchilikda belgilangan elektron (fiskal) chekni To‘lov tashkiloti o‘z tizimi orqali shakllantiradi; Foydalanuvchi chek nusxasini 11.2-banddagi kanallar orqali so‘rashi mumkin. Boshqa yo‘l bilan qabul qilingan to‘lov (5.13-band) bo‘yicha qonunchilikda belgilangan chekni Operator rasmiylashtiradi. Xo‘jalik yurituvchi subyekt bo‘lgan Foydalanuvchiga Operator elektron hisobvaraq-fakturani rasmiylashtiradi.

5.11. Rahmat sahifasi orqali har bir to‘ldirishda Foydalanuvchi to‘ldirish summasining 1 foizi miqdorida to‘lov komissiyasini (keyingi o‘rinlarda — To‘lov komissiyasi) to‘laydi. To‘lov komissiyasi to‘ldirish summasiga qo‘shib to‘lanadi va Balansga qo‘shilmaydi: masalan, Balansni 100 000 so‘mga to‘ldirish uchun 101 000 so‘m to‘lanadi. To‘ldirish summasi, To‘lov komissiyasi (butun so‘mgacha yaxlitlanadi) va to‘lanadigan jami summa Foydalanuvchi Rahmat sahifasiga o‘tishidan oldin Ilovada ko‘rsatiladi va Rahmat sahifasida aynan shu jami summa to‘lanadi. To‘lov komissiyasi to‘lovni qabul qilish uchun olinadi va to‘lov amalga oshirilgach qaytarilmaydi, To‘lov tashkiloti to‘lovni to‘liq bekor qilgan yoki qaytargan hol hamda 5.12-bandda nazarda tutilgan hol bundan mustasno.

5.12. To‘lov tashkiloti to‘lovni rad etsa yoki bekor qilsa, Foydalanuvchi to‘lovni yakunlamasa yoki uni Ilovada bekor qilsa yoxud to‘lov havolasining amal qilish muddati (24 soat) tugasa, Balans to‘ldirilmaydi; kartadan pul yechilgan bo‘lsa, uni To‘lov tashkiloti va karta chiqargan bank o‘z qoidalariga ko‘ra kartaga qaytaradi. To‘langan summa Ilovada ko‘rsatilgan jami summaga mos kelmasa yoki to‘lov havolasining amal qilish muddati tugaganidan yoxud to‘lov bekor qilinganidan keyin tasdiqlansa, to‘lov Balansga qo‘shilmaydi va pul kartaga qaytariladi. To‘lov tashkiloti to‘lovni muvaffaqiyatli deb tasdiqlagan, lekin u Balansga qo‘shilmagan va pul kartaga qaytarilmagan bo‘lsa, Foydalanuvchi 11.2-banddagi kanallar orqali murojaat qiladi va Operator tekshirib, to‘ldirish summasini Balansga qo‘shadi yoki Foydalanuvchining tanloviga ko‘ra haqiqatda to‘langan summani 6.5-bandga ko‘ra qaytaradi. Balansga qo‘shilgan to‘lovni To‘lov tashkiloti keyinchalik qaytarsa yoki bekor qilsa (shu jumladan Foydalanuvchi, karta egasi yoki karta chiqargan bankning talabi bilan), shu to‘lov bo‘yicha Balansga qo‘shilgan summa Balansdan to‘liq chegiriladi (To‘lov komissiyasi Balansga qo‘shilmagani uchun chegirilmaydi); Operator 6-bo‘limga ko‘ra qaytargan summa Balansdan bir marta chegiriladi. Natijada Balans manfiy bo‘lishi mumkin; manfiy summa Qarzdorlik hisoblanadi, bunda 5.6 va 5.7-bandlar qo‘llaniladi.

5.13. Ilovada Rahmat sahifasi orqali to‘lash imkoni bo‘lgan davrda Operatorning bank kartasiga yoki hisobvarag‘iga pul o‘tkazish va Ilova orqali to‘lov kvitansiyasini (chekini) yuborish Balansni to‘ldirish usuli hisoblanmaydi: bu davrda Operator rekvizitlariga (shu jumladan ilgari Ilovada ko‘rsatilgan kartaga) Rahmat sahifasidan tashqari yo‘l bilan o‘tkazilgan pul Balansga qo‘shilmaydi va Foydalanuvchining 6.5-banddagi arizasiga ko‘ra pul o‘tkazilgan karta yoki hisobvaraqqa to‘liq qaytariladi. Operator Rahmat sahifasi orqali to‘lashni vaqtincha to‘xtatsa, Ilovada Operatorning bank kartasi ko‘rsatiladi: Foydalanuvchi unga pul o‘tkazadi va Ilova orqali o‘tkazilgan summa hamda to‘lov kvitansiyasi (cheki) rasmini yuboradi; mablag‘ Operator tekshirib tasdiqlagandan keyin Balansga qo‘shiladi, rad etilsa, sababi Ilovada ko‘rsatiladi. Bunday to‘lovda To‘lov komissiyasi olinmaydi, o‘tkazma uchun bank komissiyasini esa Foydalanuvchi to‘laydi. Ushbu tahrir kuchga kirgunga qadar Ilova orqali yuborilgan va shu kungacha ko‘rib chiqilmagan to‘lov kvitansiyalari Ofertaning oldingi tahriri shartlari bo‘yicha ko‘rib chiqiladi.

6. Mablag‘ni qaytarish

6.1. Balansga to‘langan pul Xizmat uchun oldindan to‘lov (bo‘nak) hisoblanadi; ishlatilmagan Balans 6.2 va 6.4-bandlarga ko‘ra qaytariladi. Balansdan yechilgan Kunlik to‘lov va AI uchun haq ko‘rsatilgan xizmatlar haqi hisoblanadi va 4.4, 6.3, 11.1 va 14.4-bandlarda nazarda tutilgan hollardan tashqari qaytarilmaydi. To‘lov komissiyasi Balansga qo‘shilmaydi va 5.11-bandda ko‘rsatilgan hollardan tashqari qaytarilmaydi.

6.2. Shartnoma amal qilib turganida Foydalanuvchi har bir to‘ldirish Balansga qo‘shilgan kundan boshlab 14 kalendar kun ichida shu to‘ldirishning ishlatilmagan qismini qaytarishni talab qilishi mumkin. Qaytariladigan summa to‘ldirish summasidan va ariza berilgan kundagi Balans qoldig‘idan (Qarzdorlik qoplangandan keyin) oshmaydi. Balansdan yechimlar quyidagi tartibda qoplanadi: avval bonus mablag‘lar, keyin eng oldin tasdiqlangan to‘ldirish. Shartnoma bekor qilinganda (13.1, 13.2, 13.4, 13.5 va 14.4-bandlar) bekor qilingan kundagi ishlatilmagan Balans 14 kunlik muddatdan qat’i nazar qaytariladi; bonus mablag‘larning ishlatilmagan qismi qaytarilmaydi (5.10-band).

6.3. Quyidagilar ham qaytariladi: 1) Balansdan xato yechilgan summa — Balansga tiklanadi yoki Foydalanuvchining talabiga ko‘ra pul bilan qaytariladi; 2) 4.4, 11.1 va 14.4-bandlarda ko‘rsatilgan kunlar uchun yechilgan Kunlik to‘lov — shu bandlarda belgilangan tartibda.

6.4. Operator Shartnomani 13.4-bandga ko‘ra bekor qilganda ham ishlatilmagan Balans 6.2-bandga ko‘ra qaytariladi. Operatorning zararni qoplash haqidagi talabi qaytariladigan summadan faqat Foydalanuvchi uni yozma tan olgan yoki sud qarori bilan tasdiqlangan miqdorda chegiriladi.

6.5. Qaytarish haqidagi ariza Hisobga bog‘langan Telegram akkauntidan https://t.me/arabicone_admin manziliga yoki [email protected] elektron pochta manziliga yuboriladi. Arizada Hisob telefon raqami, qaytariladigan summa va to‘lov qilingan karta (Rahmat sahifasi orqali to‘lovda — Ilovaning Balans bo‘limidagi to‘lov yozuvida ko‘rsatilgan niqoblangan karta raqami) yoki hisobvaraq ko‘rsatiladi. Operator pulni ariza olingan kundan boshlab 10 ish kuni ichida qaytaradi. Rahmat sahifasi orqali qilingan to‘lov imkon bo‘lsa To‘lov tashkiloti orqali qaytariladi, bunday qaytarish faqat to‘lovning to‘liq summasi bo‘yicha amalga oshiriladi; qisman qaytarishda, To‘lov tashkiloti orqali qaytarishning imkoni bo‘lmasa, shuningdek boshqa yo‘l bilan qilingan to‘lovda pul to‘lov qilingan karta yoki hisobvaraqqa yoxud Foydalanuvchi arizada ko‘rsatgan, o‘ziga tegishli karta yoki hisobvaraqqa o‘tkaziladi. Pulning kartaga tushish muddati karta chiqargan bankka ham bog‘liq. Qaytarish xarajatlarini Operator to‘laydi.

7. Operatorning huquq va majburiyatlari

7.1. Operator: 1) Xizmatdan foydalanish imkonini beradi; 2) Oferta, Maxfiylik siyosati va narxlarni https://buysale.uz saytida e’lon qiladi va o‘zgarishlar haqida 5.9-band va 14-bo‘limga ko‘ra oldindan xabar beradi; 3) To‘lov tashkiloti tasdiqlagan to‘lov bo‘yicha to‘ldirish summasini 5.3-bandga ko‘ra Balansga qo‘shadi, To‘lov komissiyasini to‘lovdan oldin Ilovada ko‘rsatadi (5.11-band), 5.13-bandda nazarda tutilgan hollarda esa to‘lov kvitansiyalarini tekshirib, mablag‘ni Balansga qo‘shadi yoki rad etish sababini ko‘rsatadi; 4) ma’lumotlarni 9.2 va 9.4-bandlarda ko‘rsatilganidan tashqari oshkor qilmaydi va ularni himoya qilish uchun qonunchilikda talab qilingan choralarni ko‘radi; 5) mablag‘ni 6-bo‘limga ko‘ra qaytaradi; 6) to‘lov hujjatlarini 5.10-bandga ko‘ra rasmiylashtiradi; 7) murojaatlarga qonunchilikda belgilangan muddatlarda, talabnomalarga esa 15.1-banddagi muddatda javob beradi.

7.2. Operator quyidagilarga haqli: 1) Xizmat haqi to‘lanishini va Shartnoma shartlariga rioya qilinishini talab qilish; 2) Xizmat, narxlar va Ofertani 3.5, 5.9-bandlar va 14-bo‘limga ko‘ra o‘zgartirish; 3) Xizmatni 5.6-bandga ko‘ra to‘xtatib turish va Hisobni 4.4-bandga ko‘ra cheklash; 4) Hisob kimga tegishli ekanini va to‘lovni tasdiqlovchi ma’lumotlarni so‘rash; 5) uchinchi shaxslarning xizmatlaridan (server, tarmoq, AI, Telegram) 9.4-bandga ko‘ra foydalanish; 6) Shartnomani 13-bo‘limga ko‘ra bekor qilish.

8. Foydalanuvchining huquq va majburiyatlari

8.1. Foydalanuvchi: 1) Xizmat haqini to‘laydi va Qarzdorlikni qoplaydi; 2) kiritgan ma’lumotlarining to‘g‘riligi va qonuniyligi uchun javob beradi; 3) faqat qonuniy tovarlarni hisobga oladi va faoliyati uchun zarur ruxsatnomalarga ega bo‘ladi; 4) soliq, fiskal va buxgalteriya majburiyatlarini, shu jumladan fiskal chek berishni mustaqil bajaradi; 5) Mijozlar va Xodimlarni 9.3-bandga ko‘ra xabardor qiladi; 6) bir martalik kodlar va PIN-kodlarni sir saqlaydi (4.3-band); 7) dasturni dekompilyatsiya qilmaydi, teskari muhandislik qilmaydi, himoyani chetlab o‘tmaydi va boshqa Foydalanuvchilarning ma’lumotlariga ruxsatsiz kirmaydi; 8) Xizmatga ortiqcha yuklama beruvchi avtomatik so‘rovlar va zararli dasturlar yubormaydi; 9) Xizmat va Botdan spam, firibgarlik va boshqa qonunga xilof maqsadlarda foydalanmaydi; 10) Hisobga kirish huquqini Operatorning roziligisiz boshqa shaxsga bermaydi (Xodimlarga PIN-kod orqali kirish berish bundan mustasno); 11) Hisobda o‘z faoliyatiga mos do‘kon turini tanlaydi.

8.2. Foydalanuvchi quyidagilarga haqli: Xizmatdan foydalanish; Xodim qo‘shish va ularga ruxsat berish; Xizmatdagi mavjud eksportdan foydalanish (ushbu tahrir kuchga kirgan sanada: savdo hisoboti va xarajatlar — CSV, ombor — XLSX formatida); qo‘llab-quvvatlash xizmatiga murojaat qilish; AI yordamchidan foydalanmaslik (10.3-band); 6-bo‘limga ko‘ra mablag‘ qaytarishni talab qilish; Shartnomani 13.1-bandga ko‘ra istalgan vaqtda bekor qilish. Mavjud eksport orqali muhim ma’lumotlarni muntazam saqlab qo‘yish tavsiya etiladi.

9. Mijozlar, ta’minotchilar va Xodimlar ma’lumotlari

9.1. Foydalanuvchi Mijozlar (ismi, telefon raqami, qarzi, xaridlari), ta’minotchilar va Xodimlarning ma’lumotlarini Xizmatga o‘zi kiritadi hamda ularga ishlov berish maqsadi va muddatini o‘zi belgilaydi. O‘zbekiston Respublikasining “Shaxsga doir ma’lumotlar to‘g‘risida”gi Qonuni (keyingi o‘rinlarda — Shaxsga doir ma’lumotlar to‘g‘risidagi qonun) ma’nosida bu ma’lumotlarga nisbatan Foydalanuvchi shaxsga doir ma’lumotlar bazasining mulkdori va operatori, Operator esa Foydalanuvchi ularga ishlov berishni topshirgan shaxs hisoblanadi. Foydalanuvchining o‘z ma’lumotlariga Operator Maxfiylik siyosatiga ko‘ra ishlov beradi.

9.2. Operator bu ma’lumotlarga Foydalanuvchining topshirig‘iga ko‘ra faqat Xizmatni ko‘rsatish uchun ishlov beradi (saqlash, ko‘rsatish, hisobot tuzish, AI yordamchi javobini tayyorlash, Botga ulangan Mijozga 3.4-banddagi xabarlarni yuborish) (Shaxsga doir ma’lumotlar to‘g‘risidagi qonun 31-moddasining uchinchi qismi). Operator bu ma’lumotlarni sotmaydi, reklama uchun ishlatmaydi va 9.4-bandda ko‘rsatilgan xizmat ko‘rsatuvchilar hamda qonunchilikda belgilangan hollardan tashqari uchinchi shaxslarga bermaydi.

9.3. Foydalanuvchi quyidagilarni kafolatlaydi: ma’lumotlar qonuniy yo‘l bilan olingan; Mijozlar va Xodimlar o‘z ma’lumotlari bazaga kiritilishi, ishlov berish maqsadlari, ma’lumotlarning 9.4-bandda ko‘rsatilgan uchinchi shaxslarga, shu jumladan chet elga uzatilishi va Shaxsga doir ma’lumotlar to‘g‘risidagi qonunning 30-moddasida belgilangan huquqlari haqida shu qonun 23-moddasining birinchi va ikkinchi qismlariga muvofiq yozma shaklda xabardor qilingan; zarur hollarda ularning roziligi olingan; Xizmatga shaxsga doir maxsus ma’lumotlar kiritilmaydi.

9.4. Operator qonunchilikda talab qilingan himoya choralarini ko‘radi va ma’lumotlar ruxsatsiz oshkor bo‘lsa, bu haqda Foydalanuvchiga imkon qadar tez xabar beradi. Ma’lumotlar bazasi va yuklangan fayllar O‘zbekiston Respublikasi hududida joylashgan serverda saqlanadi. Xizmatni ko‘rsatish uchun ma’lumotlarga quyidagilar ishlov beradi: Cloudflare, Inc. (AQSh) — Xizmatga barcha ulanishlar uning tarmog‘i orqali o‘tadi; Telegram — Bot orqali yuboriladigan kirish kodlari, hisobotlar, cheklar va xabarlar; Anthropic PBC (AQSh) — AI yordamchiga so‘rovlar (10.3-band). Ularning to‘liq ro‘yxati va joylashgan davlatlari Maxfiylik siyosatida ko‘rsatilgan; ro‘yxat faqat 14-bo‘limda belgilangan tartibda kengaytiriladi.

9.5. Operator nomidan ishlaydigan shaxslar Hisob ma’lumotlariga faqat Maxfiylik siyosatida ko‘rsatilgan maqsadlarda va tartibda kiradi.

9.6. Ilova Mijozning to‘lov intizomiga qarab avtomatik ishonch belgisini (masalan, “Ishonchli”, “Ehtiyot bo‘ling”, “Xavfli”, “Yangi mijoz”) ko‘rsatadi. Belgi faqat shu Hisob ma’lumotlari asosida hisoblanadi, saqlanmaydi va boshqa Foydalanuvchilarga ko‘rsatilmaydi. U yordamchi ma’lumot hisoblanadi: Mijozga nasiyaga sotish yoki sotmaslik haqidagi qarorni Foydalanuvchi o‘zi qabul qiladi va uning uchun o‘zi javob beradi.

9.7. Mijoz, ta’minotchi yoki Xodim o‘z ma’lumotlari bo‘yicha murojaatini (ma’lumot olish, tuzatish, o‘chirish, ishlov berishni to‘xtatish) Foydalanuvchiga yuboradi va Foydalanuvchi uni qonunchilikda belgilangan muddatda ko‘rib chiqadi. Bunday murojaat Operatorga kelsa, Operator uni 11.3-bandda ko‘rsatilgan usulda Foydalanuvchiga yetkazadi va Foydalanuvchi uni Xizmat vositalari bilan bajara olmasa, unga yordam beradi.

10. AI yordamchi

10.1. AI yordamchidan foydalanish majburiy emas (10.3-bandga qarang). Uning javoblari va rasm yoki yorliqdan o‘qigan ma’lumotlari xato bo‘lishi mumkin; Foydalanuvchi muhim raqamlarni tekshiradi va qarorlarni o‘zi qabul qiladi. AI javobi Operatorning kafolati hisoblanmaydi va yuridik, soliq yoki moliyaviy maslahat emas.

10.2. AI yordamchi sotuv narxini o‘zi o‘zgartirmaydi: u taklif tayyorlaydi, narx esa Foydalanuvchi yoki ruxsati bor Xodim taklifni tasdiqlagandan keyingina o‘zgaradi, so‘ngra oldingi narxni qaytarish mumkin. Rasmdan o‘qilgan tovar kirimi ham tasdiqlangandan keyin yoziladi. Quyidagi amallarni esa AI yordamchi so‘ralganda alohida tasdiqlashsiz, darhol bajaradi: tovarlarga 0 dan 90 foizgacha chegirma qo‘yish yoki olib tashlash (chegirma kassadagi narxga shu zahoti ta’sir qiladi), AI qilgan oxirgi narx o‘zgarishini qaytarish va tayyorlagan matnni Foydalanuvchining o‘z Telegram akkauntiga yuborish. Foydalanuvchi natijani tekshiradi. Xodim AI orqali ma’lumotlarni o‘zgartiruvchi amallarni faqat Foydalanuvchi bergan alohida ruxsat bo‘lsa bajara oladi.

10.3. AI yordamchidan foydalanilganda javob uchun zarur ma’lumotlar (savol, rasmlar, suhbat tarixi va Hisobdagi tegishli ma’lumotlar, shu jumladan Mijozlar va ta’minotchilarning ismi, telefon raqami va qarzi, Xodimlarning ko‘rsatkichlari) AQShda joylashgan Anthropic PBC kompaniyasiga uzatiladi. Foydalanuvchi Botga yuborgan xabar so‘roq belgisi bilan tugasa, /savol yoki /ai buyrug‘i bilan boshlansa, Bot xabariga javob sifatida yozilgan bo‘lsa yoki qarz yozuvi sifatida tushunilmasa, u ham AI yordamchiga yuboriladi va uning uchun haq 5.8-bandga ko‘ra olinadi. Foydalanuvchi AI yordamchidan foydalanishdan oldin Mijozlar va Xodimlarni bu uzatish haqida 9.3-bandga ko‘ra xabardor qiladi. Batafsil ma’lumot Maxfiylik siyosatida berilgan. Bunday uzatishga rozi bo‘lmagan Foydalanuvchi AI yordamchidan foydalanmasligi va Botga yuqorida ko‘rsatilgan xabarlarni yubormasligi kerak.

10.4. AI yordamchiga yuboriladigan so‘rovlar soniga kunlik cheklov, rasmlar soni va hajmiga cheklov qo‘llaniladi; so‘rovlar uchun haq 5.8-bandga ko‘ra olinadi. AI yordamchi texnik sabablarga ko‘ra ishlamasa, Kunlik to‘lov kamaytirilmaydi. https://buysale.uz saytidagi suhbat yordamchisi faqat sayt sahifalaridagi ma’lumotlar asosida javob beradi, Hisoblarga kira olmaydi va uning javoblari Oferta shartlarini o‘zgartirmaydi; unga yozilgan savollar Maxfiylik siyosatiga ko‘ra saqlanadi.

11. Ishlash va qo‘llab-quvvatlash

11.1. Operator Xizmatning barqaror ishlashi uchun oqilona choralar ko‘radi, lekin uning uzluksiz ishlashini yoki muayyan ishlash vaqtini kafolatlamaydi. Texnik ishlar o‘tkazilganda Xizmat vaqtincha ishlamasligi mumkin; imkon bo‘lsa, bu haqda oldindan e’lon qilinadi. Xizmat Operatorning aybi bilan butun kalendar kun davomida ishlamagan kunlar uchun yechilgan Kunlik to‘lov Foydalanuvchining murojaatiga ko‘ra Balansga qaytariladi.

11.2. Qo‘llab-quvvatlash: Telegram — https://t.me/arabicone_admin; telefon — +998 91 267 06 06, +998 93 922 88 89; elektron pochta — [email protected]. Operator nomidan ishlaydigan shaxslar hech qachon bir martalik kirish kodini va PIN-kodni so‘ramaydi.

11.3. Operator umumiy xabarlarni Ilovadagi e’lon yoki aksept oynasi orqali, shaxsiy xabarlarni esa Hisobga bog‘langan Telegram akkauntiga Bot yoki https://t.me/arabicone_admin akkaunti orqali yozma ravishda yuboradi. Umumiy xabar Ilovada joylangan kuni, shaxsiy Telegram xabari esa yuborilgan kuni yetkazilgan hisoblanadi. Telefon qo‘ng‘irog‘i yozma xabar o‘rnini bosmaydi. Foydalanuvchi Operatorga 11.2-banddagi kanallar orqali yoki Xorazm viloyati, Urganch shahri, Tozabog’ MFY, Obodlik ko’chasi, 27-uy, 11-xonadon pochta manziliga yozadi.

12. Javobgarlik

12.1. Taraflar qonunchilik va Ofertaga muvofiq javob beradi. Operator faqat o‘z aybi bilan yetkazilgan haqiqiy zarar uchun javob beradi va boy berilgan foyda hamda bilvosita zarar uchun javob bermaydi.

12.2. Operatorning jami javobgarligi zarar yetkazilgan kundan oldingi 3 oy ichida Balansdan Xizmat haqi sifatida yechilgan summadan, bu summa kamroq bo‘lsa — Foydalanuvchining do‘kon turi uchun https://buysale.uz/narxlar/ sahifasida e’lon qilingan Kunlik to‘lovning 90 baravaridan oshmaydi. Bu cheklov majburiyatni qasddan buzishga (Fuqarolik kodeksi 333-moddasining to‘rtinchi qismi), javobgarlikni cheklash qonunchilikda taqiqlangan boshqa hollarga va 6-bo‘lim bo‘yicha qaytarishga qo‘llanilmaydi.

12.3. Operator quyidagilar uchun javob bermaydi: 1) Foydalanuvchi yoki Xodimlar kiritgan noto‘g‘ri ma’lumotlar va ular asosida qabul qilingan qarorlar; 2) Xodimlarning harakatlari; 3) Foydalanuvchining aybi bilan bir martalik kod yoki PIN-kodning oshkor bo‘lishi yoxud uning Telegram akkauntidan boshqa shaxsning foydalanishi; 4) Foydalanuvchining soliq, fiskal va litsenziya bilan bog‘liq majburiyatlarini bajarishi; 5) Foydalanuvchi va uning Mijozlari, Xodimlari yoki ta’minotchilari o‘rtasidagi nizolar; 6) Operatorning aybi bo‘lmagan holda internet, elektr ta’minoti, Telegram, qurilma yoki printerdagi nosozliklar; 7) AI yordamchi javobini tekshirmasdan qabul qilingan qarorlar; 8) tovar o‘tkazmasida kiritilgan miqdorlar, tovarning haqiqiy mavjudligi, saqlanishi va tashilishi (3.8-band); 9) Xodimlar ko‘rsatkichlari va bonus summalari asosida qabul qilingan qarorlar hamda Xodimlar bilan hisob-kitoblar (3.9-band).

12.4. Foydalanuvchi Ofertani buzishi yoki Xizmatdan, shu jumladan Mijozlar va Xodimlar ma’lumotlaridan qonunga xilof foydalanishi natijasida Operator yoki uchinchi shaxslarga yetkazilgan zarar uchun javob beradi.

12.5. Taraflar yengib bo‘lmaydigan kuch (fors-major) holatlari — tabiiy ofat, yong‘in, urush, ommaviy tartibsizliklar, davlat organlarining qarorlari, keng ko‘lamli internet yoki elektr uzilishlari — tufayli majburiyatlarni bajarmaganlik uchun javobgar emas va bir-birini imkon qadar tez xabardor qiladi. Bunday holatlar ular yuzaga kelgunga qadar ko‘rsatilgan xizmatlar haqini to‘lashdan ozod qilmaydi.

13. Muddat, to‘xtatib turish va bekor qilish

13.1. Shartnoma aksept qilingan paytdan boshlab kuchga kiradi va muddatsiz amal qiladi. Foydalanuvchi Shartnomani istalgan vaqtda 11.2-banddagi kanallar orqali Operatorga yozma (elektron) xabar yuborib bekor qilishi mumkin. Shartnoma xabar Operatorga yetgan kundan keyingi kundan boshlab bekor bo‘ladi; shu kundan boshlab Kunlik to‘lov yechilmaydi va ishlatilmagan Balans 6.2-bandga ko‘ra qaytariladi. Xizmatdan foydalanmaslik Shartnomani bekor qilish hisoblanmaydi.

13.2. Foydalanuvchi Hisob va ma’lumotlarni o‘chirishni 11.2-banddagi kanallar orqali yozma ravishda so‘rashi mumkin; Operator Hisob so‘rov yuborgan shaxsga tegishli ekanini tekshirib, ularni 30 kalendar kun ichida o‘chiradi, 13.3-banddagi yozuvlar va Maxfiylik siyosatida ko‘rsatilgan muddat tugaguncha saqlanadigan zaxira nusxalar bundan mustasno. Xizmat to‘xtatib turilgan kundan boshlab 6 oy davomida Balans bir marta ham to‘ldirilmasa va Hisobga bir marta ham kirilmasa, Operator Shartnomani bekor qilingan deb hisoblashi va Hisobni ma’lumotlari bilan birga o‘chirishi mumkin. Operator bu haqda o‘chirishdan kamida 30 kalendar kun oldin 11.3-bandda ko‘rsatilgan usulda ogohlantiradi. Shu 30 kun ichida Foydalanuvchi Hisobga kirsa yoki Balansni to‘ldirsa, Hisob o‘chirilmaydi.

13.3. O‘chirishdan oldin, shu jumladan Xizmat to‘xtatib turilgan davrda ham, Foydalanuvchi 8.2-banddagi mavjud eksportdan foydalanishi mumkin; ushbu tahrir kuchga kirgan sanada Mijozlar, qarzlar, ta’minotchilar va Xodimlar ro‘yxatini Ilovadan eksport qilib bo‘lmaydi. Qonunchilikka ko‘ra saqlanishi lozim bo‘lgan ma’lumotlar (aksept yozuvlari, to‘lov hujjatlari) Hisob o‘chirilgandan keyin ham qonunchilikda belgilangan muddat davomida, o‘chirilgan do‘kon haqidagi yozuv (nomi, telefon raqami) esa Maxfiylik siyosatida ko‘rsatilgan muddat davomida saqlanadi.

13.4. Foydalanuvchi Shartnomani jiddiy buzsa (8.1-bandning 3 va 7–10-kichik bandlarini buzish, firibgarlik, soxta to‘lov hujjatini taqdim etish), Operator buzish ko‘rsatilgan xabarni 11.3-bandda ko‘rsatilgan usulda yuborib, xabar yuborilgan kundan kamida 10 kalendar kun o‘tgach Shartnomani bir tomonlama bekor qilishi mumkin. Foydalanuvchi shu muddatda buzishni bartaraf etsa, Shartnoma bekor qilinmaydi. Qonunga xilof foydalanish yoki jiddiy zarar yetkazilish xavfi bo‘lsa, Hisob 4.4-bandga ko‘ra darhol cheklanishi mumkin.

13.5. Operator Xizmatni butunlay to‘xtatishdan kamida 30 kalendar kun oldin bu haqda Foydalanuvchiga 11.3-bandda ko‘rsatilgan usulda xabar beradi, shu muddat davomida mavjud eksport imkonini (8.2-band) saqlaydi va ishlatilmagan Balansni 6.2-bandga ko‘ra qaytaradi. Shartnoma bekor qilinganda Qarzdorlik va Shartnoma amal qilgan davrda yuzaga kelgan boshqa majburiyatlar saqlanib qoladi.

14. Ofertani o‘zgartirish

14.1. Operator Ofertani bir tomonlama faqat ushbu bo‘limda belgilangan tartibda o‘zgartiradi (Fuqarolik kodeksining 237-moddasi); Ofertaning har bir tahriri versiya raqami va kuchga kirish sanasi ko‘rsatilgan holda https://buysale.uz saytida e’lon qilinadi.

14.2. Muhim o‘zgarishlar (narx, to‘lov va qaytarish, javobgarlik, ma’lumotlardan foydalanish va ularni uchinchi shaxslarga uzatish, nizolarni hal qilish, asosiy imkoniyatlar, Foydalanuvchi huquqlarini cheklash) kuchga kirishidan kamida 30 kalendar kun oldin Ilovadagi e’londa, Hisobga bog‘langan Telegram akkauntiga yuboriladigan xabarda va https://buysale.uz saytida e’lon qilinadi; ular kuchga kirgunga qadar amaldagi tahrir qo‘llaniladi.

14.3. Yangi tahrir e’lon qilingandan kuchga kirgunga qadar Ilova uni aksept qilishni taklif qiladi va Foydalanuvchi aksept qilishni kuchga kirish sanasigacha keyinga qoldirishi mumkin. Yangi tahrir kuchga kirgach, Foydalanuvchi uni 2.2-bandning 1-kichik bandida belgilangan tartibda aksept qiladi; yangi tahrir aksept qilinmaguncha Ilovadan foydalanish cheklanishi mumkin.

14.4. Yangi tahrirga rozi bo‘lmagan Foydalanuvchi u e’lon qilingan kundan boshlab kuchga kirganidan keyingi 30 kalendar kun tugagunga qadar Shartnomani 13.1-bandga ko‘ra bekor qilishi mumkin. Bunda ishlatilmagan Balans 6.2-bandga ko‘ra, yangi tahrir kuchga kirgan, lekin Foydalanuvchi uni aksept qilmagan kunlar uchun yechilgan Kunlik to‘lov esa to‘liq qaytariladi.

14.5. Imlo xatolarini tuzatish, aloqa ma’lumotlari, manzil yoki bank rekvizitlarining o‘zgarishi hamda Foydalanuvchi huquqlarini cheklamaydigan aniqlashtirishlar qayta aksept qilishni talab qilmaydi va https://buysale.uz saytida e’lon qilingan kundan kuchga kiradi.

15. Nizolar

15.1. Nizolarni sudgacha talabnoma yuborish orqali hal qilish tartibi majburiy. Foydalanuvchi talabnomani Xorazm viloyati, Urganch shahri, Tozabog’ MFY, Obodlik ko’chasi, 27-uy, 11-xonadon pochta manziliga yoki [email protected] elektron pochta manziliga yuboradi; Operator talabnomani Hisobga bog‘langan Telegram akkauntiga yoki Foydalanuvchi ko‘rsatgan elektron pochta yoxud pochta manziliga yozma ravishda yuboradi. Talabnomada sana, talab, uning asosi, summa va uning hisob-kitobi, dalillar, to‘lov rekvizitlari va aloqa uchun telefon raqami ko‘rsatiladi. Talabnomaga u olingan kundan boshlab 15 kalendar kun ichida javob beriladi.

15.2. Talabnomaga 15.1-banddagi muddatda javob berilmasa yoki u rad etilsa, nizo quyidagi sudda ko‘riladi: Foydalanuvchi yuridik shaxs yoki yakka tartibdagi tadbirkor bo‘lsa — Operator joylashgan joydagi iqtisodiy sudda; Foydalanuvchi o‘zini o‘zi band qilgan shaxs bo‘lsa — qonunchilikda belgilangan sudda. Shartnomaga O‘zbekiston Respublikasi qonunchiligi qo‘llaniladi. Shartnoma Urganch shahrida tuzilgan hisoblanadi.

16. Til va tahrirlar

16.1. Oferta o‘zbek (lotin yozuvida) va rus tillarida tuzilgan; unga ingliz tilidagi tarjima ham ilova qilingan. O‘zbek tilidagi matn asosiy hisoblanadi, rus tilidagi matn uning tarjimasi, ingliz tilidagi matn esa faqat ma’lumot uchun berilgan tarjima; matnlar o‘rtasida nomuvofiqlik bo‘lsa, o‘zbek tilidagi matn qo‘llaniladi. Ofertaning har bir tahriri https://buysale.uz saytida alohida doimiy manzilda o‘zgartirilmagan holda saqlanadi. Ushbu tahrir: 1.2-versiya; kuchga kirish sanasi: 2026-yil 10-oktabr.

17. Operator rekvizitlari

17.1. "BUYSALE" mas’uliyati cheklangan jamiyati; STIR: 313346068; davlat ro‘yxatidan o‘tkazilganligi: 2026-yil 18-sentabrda 3356593-raqam bilan Xorazm viloyati Urganch shahri davlat xizmatlari markazi tomonidan davlat ro’yxatidan o’tkazilgan; yuridik manzil: Xorazm viloyati, Urganch shahri, Tozabog’ MFY, Obodlik ko’chasi, 27-uy, 11-xonadon; pochta manzili: Xorazm viloyati, Urganch shahri, Tozabog’ MFY, Obodlik ko’chasi, 27-uy, 11-xonadon; bank rekvizitlari: Hisob raqami: 20208000907540085001, "Hamkorbank" ATB Urganch shahri filiali; rahbar: Direktor Abdullayev Akbar Alisherovich.

17.2. Telefon: +998 91 267 06 06, +998 93 922 88 89; Telegram: https://t.me/arabicone_admin; sayt: https://buysale.uz; Ilova: https://app.buysale.uz; elektron pochta: [email protected].