Tovar kirimi: skaner, yorliq surati va nakladnoy

Kirim — kelgan tovarni omborga yozish, keyingi hamma hisob esa shunga tayanadi: qoldiq, tannarx, foyda. Bu qo‘llanmada ta’minotchi mashinasi kelgandan «Kirimni saqlash» tugmasigacha bo‘lgan yo‘l: skaner, markaziy katalog, yorliq surati, ko‘p qatorli nakladnoy, srok va partiya.

7 kun bepul sinashTo‘lov kartasi so‘ralmaydi

Qisqa javob

BuySale’da kirim kassa ekranidagi «Tovar kirimi» bo‘limida qilinadi. Qutidagi zavod kodini skanerlaysiz: tovar omboringizda bo‘lsa, uning nomi, birligi va narxlari ochiladi; markaziy katalogda bo‘lsa, nomi va bo‘limi o‘zi to‘ladi (katalogda 1 700 dan ortiq tasdiqlangan tovar, 2026-yil 3-oktabr holatiga). Siz miqdor va narxni yozib, «Kirimni saqlash» ni bosasiz — qoldiq o‘sha zahoti ko‘payadi.

Ko‘p qatorli nakladnoyni AI yordamchi suratdan ro‘yxat qiladi, lekin omborga faqat siz har qatorni tekshirib tasdiqlagach tushadi.

Tovar kelganda: avval sanab oling

Ta’minotchi ketishidan oldin kelgan tovarni nakladnoy bilan solishtiring: nomi, soni va narxi. Farqni shu yerning o‘zida aytish oson.
Srogi bor tovarda qadoqdagi sanani ko‘ring — u kirimda yoziladi va sotuv tartibini belgilaydi.
Tovarni nasiyaga olgan bo‘lsangiz, qarzni postavshiklar daftariga yozing: kirim qarzni o‘zi yozmaydi.
Tovar o‘zingizning boshqa filialingizdan kelgan bo‘lsa, uni kirim qilmang: Ombor → «O‘tkazmalar»da o‘tkazmani qabul qilasiz, aks holda u ikki marta yoziladi.

Skanerlaganda uch xil natija

Kodni telefon kamerasi yoki kompyuterga ulangan USB skaner o‘qiydi — kursor qaysi maydonda turganidan qat’i nazar, kod kod maydoniga tushadi.

Tovar omboringizda bor

Nomi, birligi va oxirgi narxlari ochiladi, ostida «Shu tovarga qo‘shiladi — yangi partiya» chiqadi. Siz kelgan miqdorni va o‘zgargan bo‘lsa yangi narxni yozasiz.

Markaziy katalogda bor

Nomi va bo‘limi o‘zi to‘ladi, forma hali bo‘sh bo‘lsa birligi ham, va «Katalogdan olindi» belgisi chiqadi. Katalogda narx yo‘q: narx va miqdor har doim sizniki.

Katalogda yo‘q

Nomni yorliq suratidan o‘qitasiz yoki o‘zingiz yozasiz. Ba’zan kod bo‘yicha faqat nomi to‘ladi — uni tekshirib, kerak bo‘lsa tuzating.

Kodni qo‘lda tersangiz va nazorat raqami to‘g‘ri kelmasa, ilova «Kod xato ko‘rinadi» deb ogohlantiradi.
20–29 bilan boshlanadigan ichki kodlar katalogdan qidirilmaydi: ular faqat bitta do‘kon ichida ma’noga ega — ichki kod nima.
Zavod kodi yo‘q tovarga kod maydonidagi «+» tugmasi do‘konning o‘z kodini yasaydi — keyin yorliq chop etiladi. Batafsil: shtrix-kod va yorliq.

«Qancha keldi» va «Narx nechtasiga»

Ikki savol alohida so‘raladi, chunki javoblari ham alohida: qancha kelgani — ombor birligida, narx — qaysi miqdor uchun aytilganida.

Birlik do‘kon turingizdagi ro‘yxatdan tanlanadi — dona, kg, litr, metr, quti, qop va boshqalar. Kg, litr va metrda kasr yoziladi, dona va qutida yo‘q.
«Narx nechtasiga»: kilogrammli tovarda 1 kg, 500 g, 250 g yoki 100 g uchun; litrda 1 l dan 100 ml gacha; metrda 1, 10 yoki 100 m uchun. Bir birlik narxini ilova o‘zi hisoblaydi.
«Kirim narxi» yoki «Jami to‘landi» — qaysi birini bilsangiz, o‘shani yozing: ikkinchisi o‘zi chiqadi.
Pastdagi qatorda ilova qanday tushunganini ko‘rasiz: miqdor, bir birlik narxi va foyda. Sotuv narxi kirimdan past bo‘lsa, shu qatorda ogohlantirish chiqadi.

Misol: 10 kg semichka keldi, hammasiga 1 200 000 so‘m to‘ladingiz, 100 grami 15 000 dan sotasiz. «Qancha keldi» — 10, birlik — kg, «Narx nechtasiga» — 100 g, «Jami to‘landi» — 1 200 000, sotuv narxi — 15 000. Ilova 100 g ning kirim narxini (12 000) va foydani o‘zi chiqaradi.

Yorliq suratidan to‘ldirish

Nom maydoni yonidagi kamera tugmasi yorliqni suratga oladi va AI kataklarni to‘ldiradi. Qadamlari ombor sahifasida yozilgan; kirim uchun muhimi — quyidagi uch narsa.

Nom har doim suratdagisiga almashadi, qolgan maydonlar — kod, srok, narx va turga qarab IMEI, razmer, proba va massa — faqat bo‘sh bo‘lsa to‘ladi. Ilova nechta maydon to‘lganini aytadi: o‘shalarni tekshiring.
Kartochkaga hali rasm qo‘yilmagan bo‘lsa, shu surat tovar rasmi bo‘lib qoladi.
Internet va ulangan AI kerak; yorliq o‘qilmasa, ilova uni yaqinroq va yorug‘roq joyda qayta suratga olishni so‘raydi. Ayrim turlarda bitta yorliq o‘qish alohida yechiladi (sinovda ham): parfumeriya va zargarlik — 10 so‘m.

Ko‘p qatorli nakladnoy: suratdan ro‘yxat

Suratni AI’ga yuboring

AI bo‘limida kamera bilan nakladnoy yoki daftar sahifasini suratga olasiz. Bitta ro‘yxatga eng ko‘pi 40 qator sig‘adi.

Har qatorni tekshiring

Qatorda nom, miqdor, birlik, kirim va sotuv narxi, srok va kod. Omborda bor tovar «omborda bor» deb belgilanadi. Yordamchiga o‘qiy olmagan joyni taxmin qilmay, bo‘sh qoldirish buyurilgan — bo‘sh kataklarni siz to‘ldirasiz.

Tasdiqlang

«Tasdiqlash va omborga qo‘shish» bosilmaguncha omborga hech narsa tushmaydi. Tasdiqlangach har tovarning qoldig‘i ko‘payadi.

Qo‘lyozma daftar ham o‘qiladi, lekin raqamlarni ko‘zdan kechiring — xato o‘qilgan raqam omborga xato qoldiq bo‘lib tushadi. Ayrim turlarda AI’ga har bir savol alohida yechiladi (sinovda ham): parfumeriya va zargarlik — 100 so‘m.

Srok va partiya

Har kirim alohida partiya bo‘lib yoziladi: o‘z sanasi, o‘z kirim narxi va srokli turlarda o‘z srogi bilan.
Sotuvda srogi eng erta tugaydigan partiya birinchi yechiladi, srogsizlari — kelgan tartibida.
Sotuvdagi tannarx yechilgan partiyalarning kirim narxidan olinadi; bir necha partiyadan yechilsa — miqdorga tortilgan o‘rtacha. Shuning uchun kirim narxi o‘zgarsa ham eski sotuvlarning foydasi o‘zgarmaydi.
Srok oziq-ovqat, parfumeriya, dorixona va «Boshqa» turidagi do‘konlarda so‘raladi; sanani qo‘lda terasiz. Srogi yaqinlashganlar — ombor sahifasida.

Do‘kon turiga qarab qo‘shimcha maydonlar

Zargarlik

Proba, massa, o‘lcham va vstavka. Har buyum alohida kartochka; sotuv narxi massa va probaning gramm narxidan taklif qilinadi, birkaga QR chiziladi.

Telefon do‘koni

IMEI va kafolat muddati (oyda). Bitta IMEI ikki apparatga yozilmaydi; IMEI keyingi apparatga o‘tib ketmasligi uchun har saqlashdan keyin maydon tozalanadi.

Kiyim do‘koni

Razmer — tovarning bir qismi: bir modelning M va L o‘lchami alohida kartochka bo‘ladi va qaysi o‘lchamdan nechta qolgani ko‘rinib turadi.

Oziq-ovqat

Srok, kilogramm va qop. Tarozida sotiladigan tovarga keyin tarozi raqami beriladi — tarozi yorlig‘i qo‘llanmasi.

Saqlash va yorliq

«Kirimni saqlash» — qoldiq darhol ko‘payadi va forma keyingi tovarga tayyor turadi: birlik va narx asosi saqlanib qoladi, chunki odatda bir xil tovar ketma-ket kiritiladi.
«Saqlash va yorliq» — saqlangan tovar uchun yorliq oynasi ochiladi: 1, 4, 8, 12 yoki 24 nusxa, narx yozilsinmi — o‘zingiz tanlaysiz.
Yangi tovar kartochkasini ochish alohida ruxsat: xodimda «Tovar qabul qilish (kirim)» bo‘lib, «Yangi tovar ochish» bo‘lmasa, u faqat omborda bor tovarni qabul qila oladi — xodim huquqlari.

Kirim nima qilmaydi

Excel yoki CSV fayldan import yo‘q — omborni Excel’ga yuklab olish esa bor. Daftardan ko‘chish yo‘llari — Excel o‘rniga dastur.
Ta’minotchi qarzini o‘zi yozmaydi — qarz alohida yoziladi.
Buyurtmani «keldi» deb belgilash qoldiqni oshirmaydi — kelgan tovar alohida kirim qilinadi.
Markirovka (Data Matrix) kodlarini o‘qimaydi.
Zargarlik do‘konida markaziy katalog yo‘q: u yerda har buyum yakka.
Saqlangan kirimni bekor qiladigan tugma yo‘q: xato qoldiq tovar kartochkasida yoki inventarizatsiya orqali tuzatiladi.

Tovar kirimi haqida savollar

Shtrix-kodsiz tovarni qanday kirim qilaman?

Kod maydoni majburiy emas: nomini yozib saqlaysiz. Keyin kassada skaner bilan sotish uchun kod maydonidagi «+» bilan do‘konning o‘z kodini yasang va yorliq chop eting.

Bir tovar ikki xil narxda kelsa nima bo‘ladi?

Har kirim alohida partiya, o‘z kirim narxi bilan. Sotuvda tannarx yechilgan partiyadan olinadi, shuning uchun foyda ikkala narxda ham to‘g‘ri hisoblanadi. Kartochkadagi kirim va sotuv narxi esa oxirgi kirimdagiga yangilanadi.

Katalogda tovarim topilmasa-chi?

Nomni yorliq suratidan o‘qiting yoki yozing — kirim baribir saqlanadi. Katalogga yozuvlarni administrator tekshirib qo‘shadi; tasdiqlanmagan yozuv do‘konga ko‘rinmaydi.

Kirim narxini sotuvchidan yashirsa bo‘ladimi?

Ha: «Kirim narxini ko‘rish» ruxsati berilmagan xodim kirim narxini ko‘rmaydi. Ruxsatlar — xodim huquqlari qo‘llanmasida.

Nakladnoyda 60 qator bo‘lsa-chi?

Bitta ro‘yxatga eng ko‘pi 40 qator sig‘adi. Uzun nakladnoyni ikki qismga bo‘lib, ketma-ket yuboring — har qism alohida ro‘yxat bo‘lib tekshiriladi va tasdiqlanadi.

Kompyuterda kirim qilsa bo‘ladimi?

Ha: ilova brauzerda ham ochiladi, kompyuterga USB skaner ulasangiz kod kod maydoniga o‘zi tushadi. Ko‘p tovarli kirimni katta ekranda qilish qulayroq.

Tayyorladi: BuySale jamoasi · Tekshirildi: 04.10.2026 · Xato topsangiz, Telegram’da bizga yozing

Birinchi kirimni bugun qiling

7 kun bepul, to‘lov kartasi so‘ralmaydi. Keyin kuniga 6 630 so‘mdan — do‘kon turiga qarab.

Bepul boshlash

Narxlar →Telegram’da yozing