Филиаллараро товар ўтказиш: омбордан филиалга

Қисқа жавоб

Жўнатиш омборда: «Танлаш» → товар ва миқдор → «Давом этиш» → қайси филиалга → «Жўнатиш».
Товар шу заҳоти омборингиздан чиқади ва қабул қилингунча «йўлда» туради.
Қабул қилувчи филиалда Омбор → «Ўтказмалар» → «Кутилмоқда»: ҳар қаторда келган миқдор ёзилади ва «Қабул қилиш» ёки «Рад этиш» босилади.
Кам келса, камомад йўқотиш бўлиб ёзилади ва жўнатувчига кўринади. Рад этилса ёки бекор қилинса, товар жўнатувчи омборига қайтади.
Партия, таннарх ва яроқлилик муддати товар билан бирга ўтади.

Омбор экранида филиалга жўнатиш учун товар танлаш — **Товарни танлаш**Омборда «Танлаш»: жўнатиладиган товарлар белгиланади ва миқдори ёзилади, кодни сканерлаш ҳам бўлади.

Филиалга жўнатиш ойнаси: қабул қилувчи филиал ва товарлар рўйхати — **Филиалга жўнатиш**Қайси филиалга, қайси товарлар ва изоҳ. «Жўнатиш»дан кейин товар омборингиздан чиқади ва «йўлда» туради.

Келган ўтказмани қабул қилиш экрани: жўнатилди ва келди миқдорлари — **Қабул қилиш**Ҳар қаторда жўнатилган ва келган миқдор, товар қайси карточкага тушиши. Пастда — «Қабул қилиш» ва «Рад этиш».

Ўтказмалар рўйхати: Кутилмоқда, Жўнатилган ва Тарих бўлимлари — **Ўтказмалар**«Кутилмоқда», «Жўнатилган» ва «Тарих»: ҳар ўтказманинг ҳолати, ким жўнатгани ва ким қабул қилгани.

Суратлар намойиш дўконидан олинган: улардаги товар номлари, ходимлар ва суммалар ўйлаб топилган. Экраннинг кўриниши эса айнан шундай.

Қадамба-қадам

Танлайсиз

Омборда «Танлаш»ни босасиз: товарлар ёнида белги ва миқдор пайдо бўлади, миқдор қолдиқдан ошмайди. Кодни сканерласангиз, товар белгиланади ёки миқдори биттага ошади.

Жўнатасиз

«Давом этиш» → қайси филиалга, рўйхат ва изоҳ (ихтиёрий) → «Жўнатиш». Товар омборингиздан чиқади, ўтказма эса «Жўнатилган» бўлимида «Йўлда» бўлиб туради.

Қабул қилувчи кўради

Қабул қилувчи филиалда Омбордаги «Ўтказмалар» тугмасида кутилаётганлар сони чиқади; эга ва рухсати бор ходимлар уни билдиришномаларда ҳам кўради.

Санаб текширади

Ҳар қаторда жўнатилган миқдор туради, келгани ёзилади (одатда ўша сон). Товар қайси карточкага тушишини илова таклиф қилади: «Мавжуд: … · қолдиқ N» ёки «Янги товар яратилади»; «Ўзгартириш» билан бошқасини танлаш мумкин.

Тасдиқлайди

«Қабул қилиш» — товар қолдиққа қўшилади; камомад бўлса, илова аввал тасдиқ сўрайди. «Рад этиш» — сабаби ёзилади ва товар жўнатувчига қайтади. Товар ҳали қабул қилинмаган бўлса, жўнатувчи «Ўтказмани бекор қилиш» мумкин.

Товар қайси карточкага тушади

Ҳар филиалда ўз товар карточкалари бор, шунинг учун қабулда илова жўнатилган товарга мосини ўзи қидиради.

Қидириш тартиби: аввал олдинги ўтказмаларда шу товар борган карточка, кейин штрих-код, кейин марказий каталог, кейин аниқ номи (бирлиги бир хил бўлса). Ҳеч бири мос келмаса — янги карточка.
Янги карточкага номи, бирлиги, таннархи, сотув нархи, бўлими, расми, кафолат муддати, кам қолиш чегараси, шу дўконда банд бўлмаган штрих-кодлари, заргарликда проба ва оғирлиги, кийимда размери, телефонда IMEI (банд бўлмаса) кўчади.
Тарози рақами (PLU), чегирма ва таъминотчи кўчмайди. Штрих-коди банд бўлса, янги ички код берилади — илова ёрлиқни чоп этишни эслатади.
Мавжуд карточкага қўшилса, унинг сотув нархи ўзгармайди — ҳар филиал ўз нархини қўяди. Кирим нархи эса фақат карточкада у ёзилмаган бўлса тўлдирилади.
Якка буюмлар (заргарлик, телефон) қолдиғи бор карточкага қўшилмайди ва проба, оғирлик, размер ёки IMEI мос келмаса бошқа буюм карточкасига ҳам тушмайди. Кийимда размер товарнинг бир қисми.

Қолдиқ, партия ва пул: ҳисоб бузилмайди

Жўнатувчи омборидан товар сотувдаги тартибда — партиялардан муддати яқинидан бошлаб — олинади ва ҳар партия ўз таннархи ва яроқлилик муддати билан ўтади.
Қисман қабул қилинса, муддати энг яқин қисми қабул қилинади; кам келгани охирги қисмдан деб олинади.
Рад этилса ёки бекор қилинса, товар ўз партияларига қайтади.
Суммалар сотув нархида кўринади; таннархдаги сумма фақат «Кирим нархини кўриш» рухсати бор одамга чиқади.
Қолдиқдан кўп жўнатиб бўлмайди — минусга сотиш ёқилган дўконда ҳам.
Қабул қилинмаган ўтказмадаги товарни ўчириб ҳам, бирлигини ўзгартириб ҳам бўлмайди.

Ким жўнатади, ким қабул қилади

Жўнатиш ва бекор қилиш

Эга ёки «Филиалга товар жўнатиш» рухсати бор ходим. Бу янги рухсат тайёр тўпламларга кирмайди — кимга керак бўлса, эга ўзи ёқади.

Қабул қилиш ва рад этиш

Қабул қилувчи филиалда эга ёки «Товар қабул қилиш (кирим)» рухсати бор ходим. Янги карточка очиш рухсати бўлмаса, ходим мавжуд товарни танлайди ёки қабулни эгага қолдиради.

Кўриш

Омбор рухсати бор ходим ўз филиалининг ўтказмаларини кўради. Эга гуруҳдаги исталган ўтказмани очади; ҳар бирида ким жўнатгани ва ким қабул қилгани ёзилган.

Ўтказма ва инвентаризация

Йўлдаги товар ҳеч қайси дўкон қолдиғида эмас, шунинг учун уни санаманг — акс ҳолда у икки марта ҳисобланади. Саноқ экрани якунланмаган ўтказмалар бўлса огоҳлантиради; аввал уларни якунлаш маъқул. Саноқда белгиланган товарни эса саноқ тугагунча жўнатиб ҳам, қабул қилиб ҳам бўлмайди. Саноқ тартиби — инвентаризация қўлланмасида. Ҳар ўтказма иловадаги билдиришномаларда ҳам кўринади.

Бу бўлим нима ҚИЛМАЙДИ

Ростини олдиндан айтамиз — кейин “шунақа деб ўйлагандим” деган гап чиқмасин.

Чоп этиладиган юк хати (накладной) йўқ — ўтказма иловада экран бўлиб туради.
Ўтказма ҳақида Telegram хабари келмайди — у фақат илова ичидаги билдиришномаларда.
Қабул қилинган ўтказмани бекор қилиб бўлмайди — товарни қайтариш учун тескари ўтказма жўнатилади.
Жўнатилганидан кўп қабул қилиб бўлмайди — ортиқча товар оддий кирим билан ёзилади.
Фақат ўз гуруҳингиз ичида: бошқа эгасининг дўконига, ёпилган ёки блокланган филиалга жўнатиб бўлмайди.
Йўлдаги товар суммаси омбор якунида алоҳида кўрсатилмайди.
Интернетсиз жўнатиб ҳам, қабул қилиб ҳам бўлмайди.

Ўтказма ҳақида саволлар

Жўнатилган товар қабул қилувчида қачон пайдо бўлади?

Фақат «Қабул қилиш» босилганда. Унгача товар «йўлда»: жўнатувчи қолдиғидан чиққан, қабул қилувчи қолдиғига ҳали кирмаган.

Кам келса нима бўлади?

Келган миқдорни ёзиб қабул қиласиз, илова камомадни тасдиқлашни сўрайди. Камомад йўқотиш бўлиб ёзилади — товар жўнатувчидан аллақачон чиққан — ва ўтказмада ҳамда жўнатувчининг билдиришномасида «камомад» бўлиб кўринади. Товар умуман етиб келмаган бўлса ва қайтиши керак бўлса, «Рад этиш»ни босинг.

Нотўғри филиалга жўнатиб юбордим — нима қиламан?

Қабул қилинмаган бўлса, «Жўнатилган» бўлимида ўша ўтказмани очиб «Ўтказмани бекор қилиш»ни босинг — товар омборингизга қайтади. Қабул қилиб бўлинган бўлса, ўша филиал товарни сизга тескари ўтказма билан қайтаради.

Қабул қилинган товарнинг нархи қандай бўлади?

Янги карточка очилса — жўнатувчининг сотув нархи ва ўтказмадаги таннарх билан. Мавжуд карточкага қўшилса — унинг сотув нархи ўзгармайди, партиялар эса ўз таннархи билан киради, шунинг учун фойда тўғри ҳисобланади.

Юк хати (накладной) чиқадими?

Чоп этиладиган юк хати йўқ. Ўтказма иловада очилади: ҳар қатор, жўнатилган ва келган миқдор, суммалар, ким жўнатгани ва ким қабул қилгани — шу экранда.

Асосий дўкондан филиалга ҳам, филиалдан асосийга ҳам бўладими?

Ҳа, гуруҳдаги исталган очиқ дўконлар орасида: асосийдан филиалга, филиалдан асосийга ва филиалдан филиалга. Филиаллар ҳақида батафсил — алоҳида саҳифада.

Филиаллараро товар ўтказиш: жўнатиш ва қабул қилиш